Sunday, September 29, 2013

Lechonan sa Kadalanan sa Digos City, 2013

Lechonan sa Kadalanan 2013 sa Digos City Ni FELIX B. DARAY Digos city
 Niadtong Septeyembre 8, 2013, gisaulog sa mga lumulupyo sa Siyudad sa Digos ang ika- 13 nga paghimugso isip usa siyudad, ang naila nga Araw nga Digos. Kining usa ka semana selebrasyon gitapos pinaagi sa tigi o contest, sa pagnilutoay sa kagumkom, lamian ug nindot nga pagkaluto nga lechong baboy. Kining kalihokan, giila ug gibantog na nga—Lechonan sa Kadalanan sa Siyudad saDigos.

 Kining pakontes, gisugdan niadtong unang pagkatuig sa siyudad; ug hangtod karon nagapadayon nga hinugopan ug gikahinaman sa mga Digosenyos. Nahimo kini ubos sa maayong hunahuna ni kanhi Mayor Arsenio Latasa, aron pagdasig sa mga katawhan nga magbuhi og baboy aron makahatag og dugang kita sa pamilya. Kini ubos usab sa awhag ni kanhi kaggawad Romualdo Crispino, usa ka negosyante nga adunay dagkong piggery ug pabrika sa feeds dinhi sa siyudad.

 Alas siete sa buntag, nagsugod nag muntar ang mga lechonero diha sa mga kalsada likod sa city hall. Matag kontestant, usa lang ka entry ang gitugot o usa lang ka baboy, apan puwede maglechon bisag pila para ibaligya. Matud pa ni Bert Zamora, City Information Officer, “mikunhod ang atong mga partisipante karon tungod kay giwagtang ang inter-barangay, ug ang inter-commercial category o stall owners sa palengke lamang ang nagpabilin.” Sukwahi sa miaging tuig nga adunay kapin sa 340 ka mga baboy ang gilechon, apan karong tuiga 2013, miabot lamang og 289 gikan sa 28 ka sumasalmot.

 Nagsugod dayon ug tuyok-tuyok ang mga lechoneros ilang gituhog nga baboy. Mingsugod nag-aso-aso, nagbagabaga na sa kaint, ug inanay nagpulapula na ang mga baboy. Mialisganw na ang kahumot sa nagtulotulo nga mantika. Alas nuybe buntag mahuman ang civic parade, midagsa ang mga kamakaon ug lechon. Nagpangamay ang mga tindera. Nagpinalitay. Nag-iyahay ug tibol-tibol ang nangaon pares sa puso (ang nilung-ag nga bugas gisulod sa udlot sa lubi nga gipurmag kasingkasing). Nagsiot ang mga mamalitay; tag P350 ang kilo. Apan dili kalikayan nga naay mopuni-punit sa mga nawisik sa tadtaran ug gipasagdan na lang,”tilaw-tilaw ra ning amo,” pasiaw nila.

Adunay nagpa raffle nga ang premyo ulo sa lechon. Matag palit nimo og duha ka kilo hatagan ka ug numero. Diha gyoy naka bh og ulo sa lechon. Ang nakasungkit sa unang premyo sa cash nga P7 mil, mao ang Violy’s Bakeshop, gisundan sa P 5 mil nga nakuha sa Molina’s Place, ug ang ikatulong dapit, ang P3 mil ngadto sa Jun and Bebs Store. Pero nalipay ang tanang miapil tungod kay nakadawat sila ug P l mil isip consolacion prize

.Matud pa sa sa usa ka lechonero nga akong nahinabi, “gawas sa lamas, among sagulan og keso,margarine condensed milk ug lemonsito para gyod molami og dugang.” Samtang nagatugtog ang live combo sa hamubo nga programa dulo sa mga lechon, dasig ug sadya uban sa kahinangop ang katawhan nga nangaon sa kagumkom ug lamian nga lechon. Dunay mga tilukon o pinilian nga gibaligya na lang ug P300 aron lang gyod mahurot.

 Nabaniog na lukop sa kapupud-ang Pilipinhon ang matag tuig nga Lechonan sa Kadalanan. Kini usa ka dakong garbo ang dakbayan matag saulog sa kasumaran human nahimong siyudad. Dugang pa, molambo ang negosyo ug eko-turismo. Ug gani karon, giila ang Siyudad sa Digos nga Lechon Kapital sa Rehiyon ll o Davao Region. Sa laing bahin, daghan pang mga aktibidades ang gihimo sa siyudad. Ang Lechonan sa Kadalanan maoy highlight sa kasaulogan sa Araw nga Digos matag ika- 8 sa Setyembre. Ang kinatibuk-ang kalihokan, gipangamahan gyod sa halangdong ug nasubli mga mayor, Hon. Joseph Penas, sa pakig-alayon sa OIC City Tourism Officer, Edgardo Elera, ug mga kapolisan nga nagbantay sa hingpit nga kahusay ug kalinaw. Awhag pa sa mayor,”uban kita sa atong tema: “Padayon sa Paglambo Pinaagi sa Maayong Panggoberno, Abante Digos.”

 Magkita-kita kita sa sunod nga Lechonan sa Kadalanan 2014.Mabuhay ka Digos!

No comments:

Post a Comment